కరోగి యాద్ తొ హర్ బాత్ యాద్ ఆయేగి

‘నచ్చిన ’ పాటలు- ‘లోపలి ’ మాటలు-144
‘కరోగి యాద్ తొ హర్ బాత్ యాద్ ఆయేగి’
(గుర్తుచేసుకుంటే, ప్రతి మాటా జ్ఞప్తికొస్తుంది)
...
కొన్ని పాటల్లోని సంగీతం మనసు ను తేలికపరుస్తుంది, అర్ధం మనసును బరువెక్కిస్తుంది. అలాంటి పాటల్లో ఇది ఒకటి.
మాటల రచయిత ‘సాగర్ సర్హది’ బాల్యంలో దేశ విభజనతో పాకిస్తాన్ నుండి కాందిశికుడిలా ఢిల్లీ కివచ్చాడు. అక్కడినుండి బొంబాయికి. రచయితగా యశ్ చోప్రా తో కలిసి విజయవంతమైన సినిమాలకు పనిచేసాడు. అందులో కభీ కభీ, సిల్ సిలా ,చాందిని వంటివి ఉన్నాయి. అమితాబ్ బచన్ తో ‘మీరు బరువైన గుండె తో రాస్తారు’ అనిపించుకున్నాడు.
‘బజార్’ సినిమాతో దర్శకుడయ్యాడు. ‘బజార్’ సినిమా కన్యాశుల్కం వంటి కథకు మరో రూపంలో హైదరాబాద్ నేపధ్యంగా నడుస్తుంది. (హిందీ సినిమాల్లో అప్పట్లో నాకు హైదరాబాద్ కొత్తగా కనిపించేది. అంతకు ముందటి ‘మెహబూబ్ కి మెహంది’, తర్వాతి ‘నిఖా’ సినిమాల్లో).
సినిమాలో సంగీతం, పాటలు మరపురానివి. పాటలు సినిమాకోసం రాసినవి కాకుండా సాహిత్యం నుండి అవసరం మేరకు ఎంచుకున్నవి. మీర్ తకి మీర్ (దిఖాయి దియె) , మఖ్దూమ్ మొహియుద్దిన్( ఫిర్ చిడీ రాత్ బాత్ ఫూలోన్ కి) కవితలు/గజల్లు అలాంటివే.
‘కరోగి యాద్’ పాట బషర్ నవాజ్ రచన. ఖయ్యాం సంగీతం, భుపెందర్ స్వరం ..వీటి విలువను మరింతపెంచిన నటినటుల నటన, చిత్రీకరణ ...వీటన్నింటితో పాట ఓ గొప్పానుభూతినిస్తుంది.

“గుర్తుచేసుకుంటే, ప్రతి మాటా జ్ఞప్తికొస్తుంది
కదిలిపోయే కాలపు, ప్రతి కెరటం ఆగిపోతుంది

ఈ చంద్రుడు కరగిపోయిన కాలానికి అద్దం ఔతాడు
కదలాడుతున్న మబ్బుల్లో ఏదో ముఖం రూపుకట్టింది
బరువెక్కిన దారులు ఏదో కథ వినిపిస్తుంది

వర్షంతో చెమ్మగిల్లిన ఋతువు పొగ గా మారుతుంది
కరగిపోతున్న కొవ్వొత్తి నిచూసి మనసు గర్విస్తుంది
అరచేతిలోని గోరింట ఏవో జ్ఞాపకాలు రేపుతుంది

వీధి మలుపులో ఒక గుమ్మం శూన్యంగా ఉంది
తపించే కళ్ళతో ఎవరిరాకకో ఎదురుచూస్తుంది
చూపులు దూరంవరకూ వెళ్ళి తిరిగి వస్తున్నాయి “

ఇష్క్ బినా క్యా జీనా

నచ్చిన ’ పాటలు- ‘లోపలి ’ మాటలు-143
ఇష్క్ బినా క్యా మర్నా యారా! ఇష్క్ బినా క్యా జీనా
(ప్రేమ లేనిది ఏమి జీవితం? ప్రేమలేనిది ఏమి మరణం మిత్రమా!)
తాల్ (1999) సినిమాలో ఏ ఆర్ రెహ్మాన్, సోను నిగమ్,అనూరాధ శ్రీరామ్,సుజాత పాడిన పాట.
హీరో ఔదామని చిత్రరంగానికి వచ్చిన ‘సుభాష్ ఘయ్ ‘ దర్శక నిర్మాతగా పెద్ద సినిమాసినిమాలు తీసి పేరుగాంచాడు. అందులో ఎక్కువ భాగం మల్టి స్టారర్లుఅందులోనూ అరుదైన కాంబినేషన్లతో తీసాడు. దిలీప్ కుమార్ తో మూడు సినిమాలు తీసాడు. అందునా ఒకటి దిలీప్ తో పాటు రాజ్ కుమార్ ను కూడా కలిపి. వీటన్నింటిలో యాక్షన్ భాగమూ ఎక్కువే.
ఐతే ‘తాల్ ‘ సినిమాలో యాక్షన్ ను పూర్తిగా పక్కనపెట్టాడు. తనతో చాలా సినిమాలకు సంగీత దర్శకులుగా పనిచేసిన లక్ష్మికాంత్ ప్యారేలాల్ స్థానంలో ఏ ఆర్ రెహ్మాన్ ను తెచ్చాడు.
సినిమాలో కథకు నేపధ్యం సంగీతమే.
హిమ పర్వత పాదప్రాంతం నుండి జానపద సంగీతం ముంబై ప్రవహించింది. ఆ ప్రాకృతిక సంగీతం ఎలా మారింది? ఆ సంగీతానికి వాహకమైన సంగీతకుటుంబం లో యువతి జీవితం ఎలా మలుపులు తిరిగింది సినిమా చూపుతుంది.
సినిమాలో ఫొటోగ్రఫీ, సంగీతం ,లొకేషన్లు, రంగులమేళవింపు ,నృత్యాలు ఆనీ సౌందర్యభరితమే.

“ప్రేమ లేనిది ఏమి జీవితం? ప్రేమలేనిది ఏమి మరణం మిత్రమా!
బెల్లం కన్నా తీయనిది ప్రేమ
చింతపండు కంటే పుల్లనిది ప్రేమ
ఈ ప్రేమ ప్రమాణం నిక్కమైనది
ఈ ప్రేమ బంధాలు సున్నితమైనవి
కింద ప్రేమ ఉంది ..పైన భగవంతుడున్నాడు
ఈ రెంటి నడుమ సమస్తమున్నది
ఒకటికాదు వంద మాటలు చెప్పు
వందమాటల అర్ధం ఒక్కటే
భగవంతుడు అతి సుందరం ..భగవంతునుకన్నా సుందరం ప్రేమ
మణి కాదు మాణిక్యం కాదు ప్రేమ
ఒకటే కోరిక ..ప్రేమ
ప్రేమ ఏమిటో ఎవరికి తెలుసు
ఐనా ప్రేమ ఏమిటొ అందరికీ తెలుసు
ఈ ప్రేమ నగరపు తెలియని దారుల్లో
ప్రియురాలి ఇంటి జాడ ఎవరికి తెలుసు?
చిన్నపాటి జీవితం పెద్దదైన యానం
ఈ ప్రేమఏమిటో ఎవరికి తెలుసు
ఇది బాధా లేక బాధకు మందా?
ఈమె ప్రియురాలా లేక దైవరూపమా?
……
నువ్వు ప్రేమ పేరు విన్నావు
నేను ప్రేమించాను
ప్రేమ ఒక పూలతోట
ప్రేమ ముళ్ళతోకూడిన వస్త్రం”

కహీ ఎక్ మాసూమ్ నాజుక్ సి లడ్కి

‘నచ్చిన ’ పాటలు- ‘లోపలి ’ మాటలు-142
‘కహీ ఎక్ మాసూమ్ నాజుక్ సి లడ్కి’
(ఎక్కడో ఒక నాజూకైన అమాయకపు అమ్మాయి.)
‘శంకర్ హుస్సేన్’(1977) సినిమాలో పాట. కమల్ అమ్రోహి రచన,ఖయ్యాం సంగీతం,మహమ్మద్ రఫీ గానం
‘శంకర్ హుస్సేన్’ సినిమా తెలుగునాట ప్రదర్శితమయ్యిందోలేదో తెలియనంత అనామకంగా సినిమా వచ్చివెఌంది. కాని అందులోని రెండుపాటలు సినిమా పేరును మరులేనట్టు చేసాయి. అందులో ఒకటి ‘బహుత్ ఖూబ్ సూరత్ ...కహీ ఏక్ మాసూమ్ నాజుక్ సి లడ్కి’. (మరొకటి ‘ఆప్ యూ ఫాసిలోం సె గుజర్ తే రహే’ లతామంగేష్కర్ గానం)
చాలా తక్కువ సంగీత ఉపకరణాలు, హెచ్చు తగ్గులు లేకుండా ఒకే స్థాయిలో సాగే గానం, విభిన్నతతో కూడిన గీతరచనలతో సాగే పాట మనసుకు హాయిగొలుపుతుంది.
‘పాకిజా’ ‘రజియా సుల్తాన్’ వంటి పెద్దసినిమాలమధ్య దర్శక, నిర్మాత, రచయిత ఐన ‘కమల అమ్రోహి’ తీసిన చిన్నసినిమా ‘శంకర్ హుస్సేన్’.ఆయన పరిమితమైన సంఖ్యలో రాసినపాటల్లో ఇది ఒకటి.
చిన్నసినిమాలో పెద్దపాట. కాలవ్యవధిలోనూ, నాణ్యతలోనూ పెద్దదే.



“ఎంతో అందం
ఎంతో అందం...కొద్దిగా ఛాయతక్కువకానీ..
ఎక్కడో ఒక నాజూకైన అమాయకపు అమ్మాయి.
తన కలలో నన్ను చేతుల్లోకి తీసుకుని
ఎప్పుడో నిద్రలో నవ్వుతూ ఉందేమో
నిదురలో అటూ ఇటూ దొర్లుతూ ఉందేమో
తల కింది దిండును జార్చుకుని ఉందేమో
ఎక్కడో ఒక నాజూకైన అమాయకపు అమ్మాయి.
పగటికలలు మనసు వాకిలిలోకి వచ్చి
ఆమెను లోలోపల సమ్మోహనపరుస్తుండవచ్చు
నిశ్చలంగా ఉన్న ఆమె గుండెలోని నిశ్శబ్దాన్ని
నాజ్ఞాపకాలసడి భంగపరచి ఉండవచ్చు
అసంకల్పితంగా నెమ్మదైన స్వరంతో
నాపాటలో తనూ గొంతుకలుపుతూ ఉండవచ్చు.
ఎక్కడో ఒక నాజూకైన అమాయకపు అమ్మాయి.
లేఖ రాయాలని తనకు అనిపించిందేమో
కాని వేళ్ళు కంపిస్తున్నాయేమో
చేతినుండి కలం జారిపోతుండవచ్చు
కోరిక తిరిగి చేతితో కలాన్ని పట్టించి వుండవచ్చు
నాపేరు తన పుస్తకంలో రాసి
పళ్ళమధ్య వేలు పెట్టి వుండవచ్చు
ఎక్కడో ఒక నాజూకైన అమాయకపు అమ్మాయి
ఎప్పుడో నిట్టూర్చి ఉండవచ్చు
తనువు కొంచెం కొంచెం జ్వలిస్తూవుండవచ్చు
తన అడుగులు తడబడుతుండవచ్చును
ఆమె దుపట్టా వేలాడుతూ నేలకు ఆనివుండవచ్చును
ఎప్పుడో ఉదయాన్ని సాయంత్రమనుకునివుండవచ్చు
ఎప్పుడో రాత్రిని పగలు గా అనుకుని వుండవచ్చు
ఎక్కడో ఒక నాజూకైన అమాయకపు అమ్మాయి
చేతులనుండి అన్నీ జారిపోతూవుండవచ్చు
పనులన్నీ అన్యమనస్కంగా చేస్తుండవచ్చు
పళ్ళేలు జారి పగిలిపోతూండవచ్చు
అప్పుడు పొయ్యిమీది పాలు పొంగిపోతుండవచ్చు
చివరగా, తన పసితనపు అమాయకత్వంతో
ఆ నాజూకు తనువు సిగ్గుపడుతూ ఉండవచ్చు
ఎక్కడో ఒక నాజూకైన అమాయకపు అమ్మాయి.”

ఢోల్ బజ్ నే లగా ! గావ్ సజనే లగా

‘నచ్చిన ’ పాటలు- ‘లోపలి ’ మాటలు-141
ఢోల్ బజ్ నే లగా ! గావ్ సజనే లగా
(డోలు మోగసాగింది,ఊరు అలంకరించుకుంటుంది)
విరాసత్ (1997) సినిమాలో పాట. ఉదిత్ నారాయణ్, కవితా కృష్ణమూర్తి గానం. జావెద్ అఖ్తర్ రచన, అను మలిక్ సంగీతం....
తమిళంలో మదురై పరిసర ప్రాంతాలు నేపధ్యమనుకోదగిన పేరులు ,వేషభాషలతతో వచ్చిన సినిమా తేవర్ మగన్.
తేవర్ మగన్ (తేవర్ పుత్రుడు) తెలుగులో క్షత్రియ పుత్రుడు అయ్యాడు. హిందీ లో ఠాకుర్ పుత్రుడు అయ్యాడు. హిందీ సినిమా పేరు విరాసత్ (వారసత్వం) గా మారింది.
దాయాదుల కక్షలు, వారితో పాటు విడిపోయిన గ్రామప్రజలు. అందులో ఒకటి మంచి పక్షం. ఆ పక్షపు నాయకుడి కొడుకు విదేశాలలో చదివి స్నేహితురాలితో ఊరికి తిరిగి వచ్చాడు. వచ్చినతను తమతో ఉండి తమబాగోగులు చూస్తాడని అతని పక్షం ఆశపడుతుంది. తండ్రి ఆశా అదే. పాట సందర్భం కొడుకు రాక.
శివాజీ గణేశన్ నటించిన అనేక పాత్రలు మిగతా భాషల్లో లబ్దప్రతిష్టులైన నటులనేకులు పోషించారు. మాతృక, రిమేక్ లు చూసిఉన్నపుడు శివాజీని మరపించటం కష్టమని చాలాసార్లు అనిపించింది. (మేజర్ చంద్రకాంత్ లో కట్టబ్రహ్మన పాత్రలో కనిపించిన ఎన్ టి ఆర్ , ఆ సందర్భం లో ‘కట్టబ్రహ్మన అంటే వారే గుర్తొస్తారు’ అన్నట్టు ఒకచోట చదివాను)
తేవర్ మగన్ సినిమాలో శివాజీ ధరించిన పాత్ర హిందీ లో అమ్రిశ్ పురి ధరించారు. నాకు ‘విరాసత్’ సినిమాను గుర్తు తెచ్చుకున్నపుడు భోజనం చేస్తూ కొడుకు ఊరిలో ఉండనని సిటీ లో ‘చైన్ ఆఫ్ ఫాస్ట్ ఫుడ్ ..రెస్టారెంట్స్’ పెట్టుకుంటానన్నపుడు ,’చాయ్ కి దుకాన్ ?‘అన్న ‘అమ్రిశ్ పురి’నే గుర్తొస్తాడు.
దర్శకుడు ప్రియదర్శన్ హిందీ లో నిలబడటానికి దోహదం చేసిన సినిమా. చెట్టినాడు హవుస్ (తమళనాడు) లో సినిమాతీసి ఉత్తరభారతమని నమ్మించగల సత్తా ఉన్నదర్శకుడు. ఈ పాటలో మాత్రం ఠాకుర్ ఇంటిలో రవివర్మ చిత్రం ‘ లక్ష్మిదేవి’ పటాన్ని ఉంచేసాడు.

“డోలు మోగసాగింది
ఊరు అలంకరించుకుంటుంది
ఎవరో తిరిగి వచ్చారు
తనతో ఎన్నో రంగులు తెచ్చాడు
మన మిత్రుడు వచ్చాడు
మనం ఆడుతూ పాడుదాం!
మన హృదయాలు నాట్యం చేస్తున్నాయి
మనం ఆడుతూ పాడుదాం!
వచ్చినవారు మననొదిలి తిరిగి పోగూడదు
చేతులు జోడించి పాదాలు మొక్కుతాం
మనసు గాయపరచి పోనివ్వం
మా యువరాజు వచ్చాడు ,రాజేశ్వర్ వచ్చాడు
తనతో రంగులెన్నో తెచ్చాడు
మన మిత్రుడొచ్చాడు
ప్రేమతో నిండిన మనసొకటి ఉంది
నా చిన్ననాటి నేస్తం,నా గ్రామం
ఈ నూతినీరు బహు తియ్యన
ఈ చెట్టు నీడ బహు చల్లన
ఈ గాలిలో విచ్చిన సంగీతం లా
గాలిమరల శబ్దం విను
శ్రావ్యమైన పాట లాఉంది
స్వరబద్దమైన పక్షికూత
ఎన్నోయేళ్ళతరవాత తిరిగి వచ్చాను
తెలుసుకున్నాను... ఈ ఊరి రీతి రివాజులు శతాబ్దాలనాటివి”

లిఖే జో ఖత్ తుఝే

‘నచ్చిన ’ పాటలు- ‘లోపలి ’ మాటలు-140
లిఖే జో ఖత్ తుఝే
(నీకు లేఖ రాస్తే )
...
కన్యాదాన్ సినిమాలో మహమ్మద్ రఫీ పాడిన పాట.నీరజ్ రచన,శంకర్ జై కిషన్ సంగీతం.
శశికపూర్ సినిమాల్లో పాటలు బాగుంటాయి. కారణం అవి శశి కపూర్ వి కావటమా? లేక అరవై డెబ్భైలలో అతని సినిమాలు రావటమా?
`చోర్ మచాయే షోర్` సినిమా లో మొదటిసారి శశికపూర్ ను చూసాను. ఆ తర్వాత ‘ఫకీరా’ సినిమా. ఇవి చూడటానికి కారణంఅవి తెలుగులో కృష్ణతో రావటం. రెంటిలోనూ తెలిసిన పాటలున్నాయి. అప్పటికి వివరాలు తెలియవు కానీ రెంటికీ రవీంద్ర జైన్ రచన, సంగీతం చేసారు. చోర్ మచాయే షోర్ లో రెండు పాటలు కిశోర్ కుమార్ వి,రెండు రఫీ వి.ఇప్పటికీ మనసుకోరే పాటలే. జాగ్రత్తగా `పావ్ మె డోరీ ` పాట వింటే అందులో `గోరి తెరా గావ్ బడా ప్యారా`(చిత్ చోర్) కు బీజాలు దొరుకుతాయి.
`ఫకీరా`లో ఖవాలీ, టైటిల్ సాంగ్, `దిల్ మె తుఝె బిఠాకె` పాటలు వినసొంపైనవే.
అంతకుముందుపాటలు..షర్మిలి లో `ఖిల్ తె హై గుల్ యహా`, ` ఓ మెరి శర్మిలి` పాటలు ,ప్యార్ కా మౌసమ్ లో `తుమ్ బిన్ జావూ కహా`, ని సుల్తనా రే రేడియోలో తరచూ వినపడేవి. జబ్ జబ్ ఫూల్ ఖిలే లో బాగుండని పాటఏది?

డెబ్బైఐదు తర్వాత శశికపూర్ నటించిన మల్టీ స్టారర్ లు .త్రిశూల్ నుండి సిల్ సిలా వరకూ మహమ్మద్ రఫీ,కిశోర్ కుమార్ లు పాడిన పాటలు మనోరంజితాలు.
శశి కపూర్ ను పాతసినిమాలలో చూస్తే సంస్కారవంతంగా పెరిగిన పెద్దింటి అబ్బాయిలా ఉంటాడు. రాజేశ్ ఖన్నా లా అమ్మాయిలకు హార్ట్ థ్రోబ్ కాడు. ధర్మేంద్ర లా కండగల వాడుకాదు. అమితాబ్ లా హై ఇంటెన్సిటీ నటన చూపగలవాడుకాదు. ఐనా వీరందరిమధ్యా సంవత్సరానికి ఐదారు సినిమాలు చొప్పున నటించగలిగాడు.

వారితో పాటు అనేక మల్టి స్టారర్లలో పాత్రోచితంగా నటించి తన ఉనికిని తెలియజెప్పాడు. అందులో అనేక సన్నివేశాలను బాలెన్స్ చేయగలిగాడు.
దీవార్ లో అన్నదమ్ముల బావోద్వేగాలతో కూడిన సంభాషణ నలభైయేళ్ళుగా ప్రతిధ్వనిస్తూనేఉంది.

కాలా పత్థర్ సినిమాలో వేరు వేరు కారణాలతో జ్వలిస్తూ సంఘర్షించే అమితాబ్, శతృఘన్ సిన్హా ల మధ్య సయోధ్యయత్నించే పాత్రను ప్రతిభావంతంగా పోషించాడుఱోటి కపడా ఔర్ మకాన్, కభీ కభీ, సిల్ సిలా సినిమాలలో అర్ధవంతమైన నటన చూపాడు.

నటుడు శశి కపూర్ కు వీరాభిమానులు తక్కువ.అలాగే అభిమానించనివారు ఇంకాతక్కువ. అతను సినిమాను తన భుజానవేసుకుని విజయపధానికి చేరవేసినవి అరుదు. అలాగని అతనున్న సినిమాకు అతనెప్పుడూ బరువుకాలేదు. అతను తన సినిమాలలో `ప్రదర్శనను కొల్లగొట్టిన` సందర్భాలు ఉండవు.కాని అతను ఆ సినిమాలో లేకుంటే అది లోటే ఔతుంది.

''నీకు లేఖ రాసినపుడు, నీ జ్ఞాపకాలతో
వేలాదిరంగులతో నిండిన దృశ్యమయ్యింది
పొద్దుపొడిచినపుడు పువ్వులామారింది
రాత్రివేళలో తారల్లా మారింది
ఎక్కడ ఏ పాట వినపడినా నువ్వొచ్చావని మనసు చెప్పింది
ఎప్పుడు ఏ మొగ్గ వికసించినా నువ్వు సిగ్గుపడుతున్నవని అనుకున్నాను
ఏ సుగంధం వ్యాపించినా నీ కురులు తేలియాడుతున్నాయనిపించింది

వాతావరణం రంగులమయం, సొగసు రంగులమయం, ఈ లజ్జ,ఈ సిగ్గు
ఈ వళ్ళు విరుపు, ఈ వంటరితనం, బాధించటం, వదలిపోవటం
ఈ యవ్వనమాయ పిచ్చివాడిని చేయనిదెవరిని?
నీవెక్కడో నేనక్కడే, నాహృదయ స్పందన నువ్వే
నేను యాత్రికుడ్ని నూవ్వు గమ్యానివి, నేను దాహాన్ని నువ్వు వానజల్లువు
నీ చూపులే నా ప్రపంచం, నీ పైటనీడే నా స్వర్గసీమ''

`శ్రీదేవి `సినిమా లో రాసాను ప్రేమలేఖలెన్నో పాటపై ఈ పాట ప్రభావం ఉందనిపిస్తుంది.

జిస్కె సర్ హో ఇష్క్ కి ఛావ్

‘నచ్చిన ’ పాటలు- ‘లోపలి ’ మాటలు-139
‘ జిస్కె సర్ హో ఇష్క్ కి ఛావ్..పావ్ కె నీచే జన్నత్ హోగి ‘
(“ఎవరి శిరస్సు ప్రేమ నీడన ఉందో,వారి పాదాలకింద స్వర్గం ఉంటుంది)
దిల్ సె సినిమాలో సుఖ్విందర్ సింగ్ ,సప్నా అవస్థి పాడిన పాట. ఏ ఆర్ రెహ్మన్ సంగీతం. గుల్జార్ రచన
రైలు ప్రయాణపు చప్పుళ్ళు, సైరన్ (సీటీ) మోత (రైలు కూత) పాట సంగీతంలో కలిసిపోవటం చాలాపాటల్లో వుంది. అందులో చాలా పాటలు పాపులర్ అయ్యాయి.
రైలు లోపలి పాటలు (రుఖ్ సే జరా నకాబ్, పల్ దో పల్ కా, యే గోటేదార్ ), కథానాయిక రైలులో ఉంటే హీరో రోడ్ ప్రయాణం పాటలు ( మేరే సపనో కి రానీ) ఆతర్వాత రైలు పైన ప్రయాణిస్తూ పాడే పాటలు వచ్చాయి.
రైలు పైన గుర్తొచ్చే పాటలు ‘హమ్ దోనో దో ప్రేమీ’ (అజ్ నబీ), హోగా తుమ్సే ప్యారా కౌన్ (జమానే కో దిఖానా హై), ‘జిస్కె సర్ హొ ఇష్క్ కి ఛావ్’ (దిల్ సె 1997).
‘హమ్ దోనో దో ప్రేమీ ‘ పాట ,పాట అనటంకంటే సంభాషణల్ని ఆర్ డీ బర్మన్ తన సంగీతంలో ఇమిడ్చేసి మాయచేసాడనవచ్చు. అర్ధం బహు సామాన్యం. వినటానికీ చూడటానికీ ఆనందకరం. ‘హోగా తుమ్సే ప్యారాకౌన్ ‘పాట స్టూడియో తీసారు.చూడటానికి ఇబ్బందికరం.
‘జిస్కె సర్ హో ఇష్క్ కి ఛావ్ ‘ పాట అన్నిరకాలుగా ఆనందకరం.
అందమైన నీలగిరి కొండలు,మెలికలుతిరిగేరైలు మార్గం, తెరనిండా రంగులు,నటులు,ఆకర్షణియమైన నృత్యం, అంబరాన్నందుకునే సుఖ్వీందర్ స్వరం, చక్కని బీటు తోపాటు ‘ జిస్కి జుబా ఉర్దూ కి తరాహ్ ‘ ‘ తావీజ్ బనాకె పెహనూ ఉసే’ వంటి చిత్ర పద బంధాలతో సాగే రచన.

“ఎవరి శిరస్సు ప్రేమ నీడన ఉందో
వారి పాదాలకింద స్వర్గం ఉంటుంది
ఆ నీడన నడు ….
ప్రేమ నీడన నడు ...నడు
స్వర్గం పై కాలిడి నడు ..నడు

ఆ సహచరి సుగంధం లాంటిది
ఆమె నోటిమాట ‘ఉరుదూ’ లాంటిది
నా సాయంత్రాలు రాత్రులు,నా లోకం
నా సహచరి,ప్రియురాలు.

పూలలో దాగుతుంది, అత్తరులా
పరిమఌంచి ఎక్కడుందో తెలుపుతుంది
అద్భుతంలా ఎక్కడైన దొరికితే
తావీదు లా తనను ధరిస్తాను

నా సహచరి నా ప్రార్ధన లాంటివి
నా పాటా ఆమే..నా విశ్వాసప్రకటనా ఆమే
ఆ సహచరి పోలిక కదిలే మంచుబిందువు
ఆమె పాదాలకింద స్వర్గం కదలాడుతుంది
కొన్నిసార్లు కొమ్మలలో ...కొన్నిసార్లు ఆకులలో...
గాలిలో ఆమెజాడను వెతుకుతాను నేను

వెలుగునీడలమధ్య దోబూచులాడే
తన అన్ని రూపాలసారాన్నినేను
తను చిలిపిదనంతో రంగులు మారుస్తుంది
నేను రూపురంగుల అన్వేషిని”

సుహానీ రాత్ ఢల్ చుకీ

‘నచ్చిన ’ పాటలు- ‘లోపలి ’ మాటలు-138
మనసు కొన్ని పాటల్ని ,అవి విన్నప్పటి పరిసరాలు, వాతావరణం, మనసికస్థితి...వీటితో కలిపి ముద్దచేసి దాచుకుంటుంది.
తిరిగి ఆ పాట విన్నప్పుడు ,ఆ ముద్ద వెన్నలా కరుగుతుంది.
1989 అక్టోబరు నెల. ట్రైనింగు లో భాగంగా ‘ఇల్లెందు ‘ కాలరీస్ లో గెస్ట్ హవుస్ లో మకాం. ఆ గెస్ట్ హవుస్ బ్రిటిషర్స్ కాలంలో కట్టబడింది. పొడవైన వరండాలు, అసాధారణమైన ఎత్తులోఉన్న రూఫు, మామూలు గదులనుమించి విశాలంగాఉన్న స్నానశాలలు,పాతకాలపుడిజైన్లతో టేకు ఫర్నిచరు.పాశ్చాత్యశైలిలోఉన్న వంటశాల,అ...ందులోనుండి కిటికీ ద్వారా వంటకాల రవాణా. నాణ్యమైన పింగాణీ సామాను. ..
ఒకనాడు ఉజ్వలంగావెలిగిన రాజసౌధాన్ని ఆ గెస్ట్ హౌవుస్ నాకు గురుతెచ్చేది.
దానితో కూడిన వాతావరణం తెలియకుండానే నాతో లేని గంభీరాన్ని ప్రదర్శింపజేసేట్టుండేది.
ఒకరోజు సెకండ్ షో సినిమాచూసి నడుచుకుంటూ వస్తున్నాను.చేతులు జేబులోపెట్టుకునేమాత్రపు చలి.ఇల్లందు పారిశ్రామికవాడ మనసులో ఏమిదాచుకుందో తెలియదు కాని భయంగొలిపేలాంటి ప్రశాంతత.అక్కడక్కడా మిణికుమిణుకుమనే వీధిదీపాలు. శిక్షణలో ఉన్న ఫారెస్ట్ ఉద్యోగులతో కోలాహలంగా ఉండే అటవీశాఖ హాస్టలు దగ్గర సడిలేదు. గెస్ట్ హవుస్ గేట్ దగ్గర వాచ్ మన్ స్వెటరుతో కూర్చుని ఉన్నాడు. ఆరిపోతున్న చలిమంట, గేట్ ని ఆనుకునే ఇద్దరు చేతులుకలిపితే అందేంత కాండమున్న చెట్టు. పైనుండి జలపాతంలా జారుతున్న వెన్నెల. వాచ్ మన్ పక్కనున్న ట్రాన్సిస్టర్ నుండి ఈ పాట. వెంట్రుకలు నిక్కబొడుచున్నాయి.వళ్ళంతా మైమరపు.

‘సుహానీ రాత్ ఢల్ చుకీ ,న జానె తు కబ్ ఆవొగీ’
“అందమైన రేయి గడచిపోతుంది, నీ రాక ఎపుడో తెలియదు
లోకపు ఋతువు మారిపోతుంది, నీ రాక ఎపుడో తెలియదు
చోటులన్నీ తమ ఆనందాలు వెదజల్లి నిదురించాయి
తారలన్నీ తమ వెలుగులు చూపి చూపి నిదురించాయి
ప్రతి దీపము వెలిగి మలిగింది ,నీ రాక ఎపుడో తెలియదు
నీకై ఎదురుచూపుతో నేనిక్కడ తపిస్తున్నాను
వసంత ఋతువులోనే శిశిరం వచ్చింది
గాలి కూడా దిశను మార్చుకుంది ,నీ రాక ఎపుడో తెలియదు”
మహమ్మద్ రఫీ పాడిన షకీల్ బదాయుని రచన. నౌషాద్ స్వర రచన. హిందీ సినిమా పాట ఈ పాటతోనే కొత్తపుంత తొక్కిందంటారు. అదే పుంత పై యాభైయేళ్ళు హిందీ పాట నడచింది